Short and Crisp : २ कटिंग
06 May 2020 15:34:26
- निहारिका पोळ सर्वटे
कधी कधी काही लघुपट नकळत पण एक छाप सोडतात मनावर, तसाच काहीसा हा लघुपट. कटिंग म्हटलं की कॉलेज जवळची टपरी आठवते आणि मित्रांसोबत मारलेल्या अखंड गप्पा. मात्र या २ कटिंग ची कथा वेगळी आहे. ही गोष्ट आहे कुणाल आणि अन्विताची. कुणाल एक पेंटर आहे, आर्टिस्ट आहे. आणि त्याला पेंटिंग ही फक्त एक ‘हॉबी’ म्हणून न ठेवता त्याच्याचत करिअर करायचं आहे. ही फील्ड काही स्टेबल नाही आणि कुणाल खूप महत्वाकांक्षीही नाही. मात्र त्याच्या वडीलांचा आग्रह असतो कि त्यानी लग्न करावं. चार जबाबदाऱ्या पडल्या कि तो देखील पैसा कमावण्याबाबत थोडा सीरिअस होईल, असं त्याच्या वडीलांचं मत असतं आणि त्या मतानुसारच ते कुणालसाठी अन्विताला शोधून आणतात, आणि कुणाल राहतो तिथे त्यांची भेट होते. आई वडील एका गावात आणि कुणाल अन्विता दुसऱ्या गावात असे हे दृश्य. कुणालला मात्र हे टिपिकल लग्न प्रकार नको असतो, कारण त्याच्या मते मुलींना सेटल्ड मुलं हवी असतात आणि तो त्यातला नाही, त्या अपेक्षांचं ओझं त्याच्यावर पडू नये म्हणून तो जरा नाखुशीनेच अन्विताला भेटतो.
एकूणच कुणाल आणि अन्विता या दोन विरुद्ध टोकाच्या लोकांचं आपसात लग्न होऊ शकत नाही, अशा निश्कर्षावर आपण पोहोचतो, आणि मग या लघुपटाचा शेवट येतो जो खूपच सुंदर आहे. अन्विताचा मोनोलॉग ऐकण्यासारखा आहे, कारण आताच्या काळात अशा विचारांच्या मुली मिळणे म्हणजे एक स्वप्नच असे म्हणता येईल. एकूणच एक चांगला संदेश हा लघुपट देतो.
एकदा तरी नक्की बघावा असा हा लघुपट आहे. तुम्हाला कदाचित हा ‘अनरिअलिस्टिक’ वाटेल, किंवा असं वाटले कि लग्न कर आणि मग कळेल कि पैसे किती महत्वाचे असतात वगैरे. पण अन्विताचे विचार नक्कीच विचार करण्यासारखे आहेत. या लघुपटात मुख्य भूमिका साकारली आहे, अक्षय केळकर आणि समृद्धी केळकर यांनी. लघुपटाचं दिग्दर्शन केलं आहे, कुणाल राणे यांनी तर फिल्मबाझ फिल्मच्या यूट्यूब चॅनल वरुन हा लघुपट प्रदर्शित करण्यात आला आहे. या लघुपटाला २ लाख ६० हजारांहून अधिक व्ह्यूज आहेत.
आवर्जून बघा एकदा तरी..